Magandang simula ang ipinakita ng NLEX Road Warriors at Blackwater Bossing sa pagbubukas ng 2025 Kadayawan Invitational Basketball Tournament matapos magwagi sa kani-kanilang unang laban nitong Huwebes, Agosto 21, sa USEP Gym sa Davao City.Unang nagpasiklab ang Blackwater matapos talunin ang Phoenix Fuel Masters, 94-81. Pinangunahan ni 2024 second overall pick Sedrick Barefield ang opensa ng Bossing sa kanyang 28 puntos, kabilang ang anim na tres kung saan tatlo rito ay sunod-sunod sa fourth quarter para tuluyang kumawala sa 72-66 na abante.Nag-ambag din si Troy Mallillin ng 17 puntos at anim na rebounds, habang magandang debut game ang ipinakita ni Jed Mendoza na may 16 puntos.Para sa Phoenix, nanguna sina Jason Perkins at Kai Ballungay na kapwa umiskor ng tig-12 puntos sa unang laro sa ilalim ni bagong head coach Willie Wilson, na pumalit kay Jamike Jarin na ngayon ay team consultant na.

Pagkatapos ng kampanya ng Alas Pilipinas sa Nakhon Ratchasima, Thailand, ay patungo naman ang mga ito sa Ninh Bình, Vietnam para sa Leg 2 ng 2025 SEA V.League na magsisimula sa Agosto 8 hanggang 10, kung saan muling magtatagisan ng lakas ang Pilipinas, Thailand, Vietnam, at Indonesia.Matatandaang nakamit ng Alas Pilipinas ang ikatlong sunod na bronze medal sa SEA V.League matapos talunin ang Indonesia, 25-20, 25-20, 16-25, 25-13, sa laban para sa ikatlong puwesto sa Leg 1. Bronze din ang nakuha nila noong 2024 sa parehong torneo.“One step closer, more to chase,” ani Angel Canino, na pinarangalan bilang Best Outside Spiker sa Leg 1.Si Canino rin ang tinanghal na Best Outside Hitter sa 2025 AVC Nations Cup, kung saan nagtala ng makasaysayang silver medal ang Alas Pilipinas.Magugunitang tinalo ng bansang Thailand ang Pilipinas (25-17, 24-26, 20-25, 20-25) at Vietnam (13-25, 21-25, 25-23, 9-25) bago nakuha ng Thailand ang gold kontra Vietnam sa finals ng Leg 1.Kasama ni Canino sa Leg 1 sina team captain Jia De Guzman, Bella Belen, Shaina Nitura, Eya Laure, Vanie Gandler, Leila Cruz, Maddie Madayag, Mars Alba, Dell Palomata, Fifi Sharma, Thea Gagate, Dawn Catindig, Justine Jazareno, at Cla Loresco.

Nag-qualify na ang Meralco Bolts bilang nag-iisang kinatawan ng Philippine Basketball Association (PBA) para sa 2025–26 season ng East Asia Super League (EASL).Sa ikatlong pagkakataon, muling sasabak ang Bolts sa prestihiyosong regional tournament. Isa rin itong makasaysayang tagumpay para sa koponan, dahil sila pa lamang ang ikatlong club team na makakalahok sa EASL ng tatlong sunod na beses—kasunod ng Ryukyu Golden Kings ng Japan at New Taipei Kings ng Chinese Taipei.Unang sumabak ang Meralco sa inaugural season ng EASL noong 2023–24, kung saan una nilang naranasan ang matinding kompetisyon sa international stage. Ang karanasang iyon ang naging inspirasyon at pundasyon sa kanilang kauna-unahang PBA championship—ang 2024 Philippine Cup—na siya ring naging susi para sa kanilang pagbabalik sa EASL sa ikalawang pagkakataon.