Ipapasubasta na ni nine-time PBA MVP June Mar Fajardo ang kaniyang unang MVP trophy para magpa-abot ng tulong sa mga kababayan nito sa Cebu na nasalanta ng Bagyong Tino. Ayon kay Fajardo, pinili nito ang unang MVP trophy dahil ito ang resulta ng kaniyang pagsusumikap sa paglalaro ng basketball.“Yung trophy na ’yon, espesyal sa akin kasi years of hard work ’yon. Pero mas espesyal sa akin ang mga Cebuano,” ani Fajardo. Labis din na nalungkot si Fajardo sa sinapit ng kaniyang mga kababayan sa Cebu lalo na ang mga nawalan ng tahanan, ng ikabubuhay, at ng minamahal sa buhay. Hinimok din nito ang mga Cebuano na patuloy na magdasal at umasa sa tulong na magmumula sa Diyos at huwag mawalan ng pag-asa. “Masakit makita na ang daming nawalan — bahay, hanapbuhay, at pamilya. Alam kong mahirap bumangon, pero tiwala lang tayo, pray lang tayo kay God. Magpo-provide naman si God para sa atin.” ani Fajardo.

Magbibigay ng donasyon ang East Asia Super League para sa mga nasalanta ng Bagyong Tino sa lalawigan ng Cebu. Ito ay sa pamamagitan ng “Relief Game” ng EASL sa pagitan ng Meralco Bolts at ng Macau Black Bear sa darating na Sabado, Nobyembre 15. Ayon kay EASL CEO Henry Kerins, lahat ng kikitain ng labang ito sa Sabado, ay mapupunta lahat sa mga biktima ng Bagyong Tino. “All proceeds from the game are matched by Cebu City and Cebu Governor for relief. Landmark night for the league (with) its first charity game for disaster relief…all ticket revenue will go directly to those affected by the earthquakes and flooding that hit Cebu.” ani Kerins.Umaasa ang EASL na makakapagbigay ng bagong pag-asa ang basketball for a cause lalo’t tampok sa Meralco Bolts ang proud Cebuano na si Raymar “Toto’ Jose.Ito ang magiging ikalawang EASL game sa Cebu matapos ang hosting ng 2024 EASL Final Four sa Hoops Dome sa Lapu-Lapu City tampok ang kampeonato ng Chiba Jets ng Japan kontra sa Seoul SK Knights ng Korea.

Sasabak si Filipina tennis star Alex Eala sa isasagawang 2025 MGM Macau Tennis Masters sa susunod na buwan. Makakasama ni Eala ang mga mahuhusay na mga tennis player kung saan isang exhibition format ang ipatutupad sa naturang event na pangungunahan nina tennis legends at dating Grand Slam champion Li Na at Conchita Martinez.Bukod kay Eala, masisilayan din sa naturang naturang event sina world No. 9 Mirra Andreeva, at sina ATP players Shang Juncheng, Jack Draper at Jakub Menšík.Una rito, maglalaro muna si Eala sa isasagawang 33rd SEA Games sa Thailand sa darating na Disyembre 9 hanggang 20 sa Thailand bago lumahok sa Macau Tennis Masters. Ito na rin ang huling season ng paglalaro ni Eala ng tennis sa taong ito. “My season comes to an end. I have no words to describe what 2025 has brought me. My dreams have truly come alive,” ani Eala.