NLEX, Blackwater panalo sa pagbubukas ng Kadayawan Tournament
6
Hong Kong Eastern nakalasap ng unang pagkatalo vs. Elasto Painters
Rico Lucero
Nakatikim ng unang pagkatalo ang Hong Kong Eastern sa mga kamay ng Rain or Shine Elasto Painters sa kanilang sagupaan nitong Miyerkules ng gabi, December 4, sa Ninoy Aquino Stadium sa pagpapatuloy ng PBA Season 49 Commissioner’s Cup, 99-81.
Maganda agad ang mga ipinakitang depensa at rebounding ng Elasto Painters at napababa din nila ang porsyento ng three-point shooting ng Hong Kong Eastern at napataas naman nila ang porsyento ng kanilang three-point shooting kung kaya hindi na nagawa pang makalamang ng Eastern.
Ayon kay Rain or Shine coach Yeng Guiao, masaya ito na nakasungkit sila ng unang panalo.
"We played really good defense against a bigger team, 'no. I think 'yun 'yung crucial," ani coach Guiao.
Maganda rin ang ipinakitang performance ni Deon Thompson sa kanyang debut game kung saan kuntento si Guiao sa ginawa nitong 21 points at 15 rebounds.
"We're happy with the way he perform. He was late coming in. Wala pa siyang isang linggo, but he changed our chemistry for the better. Mas maganda ang ikot ng bola namin sa kanya."
"He's got the inside game and the outside game. Medyo malas pa sa labas. 'Pag lumabas [ang] tunay na laro, mas magiging problema siya ng ibang team,” dagdag pa ni Guiao.
Kumamada naman ng 18 points at five rebounds si Leonard Santillan, habang mayroong 10 points si Caelan Tiongson, gayundin si Keith Datu na nag-ambag ng 10 points at walong rebounds.
Sa panig naman ng Hong Kong Eastern, kumamada ng 30 points at 12 rebounds si Cameron Clark, habang sina Ying Lung Cheung at Sheik Muhammad Sulaiman ay nag-ambag ng tig-11 points para sa kanilang koponan.
Sunod na haharapin ng Rain or Shine ang San Miguel Beermen sa Martes, December 10 sa Filoil Eco Oil Center sa San Juan City habang sasagupain naman ng Hong Kong Eastern ang TNT Tropang Giga sa Biyernes, December 6, sa Ninoy Aquino Stadium, sa Maynila.
Scores:
RAIN OR SHINE 99 – Thompson 21, Santillan 18, Datu 10, Tiongson 10, Nocum 8, Ildefonso 8, Caracut 7, Belga 5, Clarito 4, Lemetti 3, Asistio 3, Demusis 2.
EASTERN 81 – Clark 30, Cheung 11, Sulaiman 11, Cao 9, Blankley 7, Lam 6, Zhu 5, Guinchard 2, Chan 0, Leung 0, Pok 0, Xu 0.
Quarter Scores: 24-18, 43-34, 70-64, 99-81
