Converge, hawak na ang ikalawang pwesto sa PBA Commissioner’s Cup

Nasungkit ng ng Converge ang solo No. 2 seed at namuro sa twice-to-beat incentives matapos talunin ang Blackwater Bossing, kagabi, January 19, sa nagpapatuloy na PBA Season 49 Commissioner’s Cup sa Ynares Sports Center sa Antipolo. 

Tinambakan ng Converge ang Blackwater, 127-109 kung saan bumida sa panalo si Jordan Heading na nagtala ng 22 points, habang mayroong 20 points, 10 rebounds, tatlong assists at dalawang shot blocks si Justine Baltazar, at sumuporta naman kay Hea­ding ang import na si Cheick Diallo na may 20 puntos at 18 rebounds.

Nag-ambag din ng 19 puntos si Alec Stockton, at may tig-10 puntos sina Schonny Winston at JL Delos Santos. Sinabi naman ni Converge coach Franco Atienza, na hindi umano naging sapat ang kanilang depensa, dahil nakagawa pa ng malaking puntos si George King ng Blackwater. 

“Mataas eh lalo na nung first quarter, and George King still had 34 points, so yung focus namin was to tighten up the defense. Gladly, our guys responded. Late eliminations na, so kailangan naming dumepensa. Yun ang focus namin today, and dadalin yan sa next games namin. We knew that we would be able to score, we have good guys, but going into this game, our focus was on defense,” ani Atienza.

Sa kasalukuyan, mayroon ng walong panalo at tatlong talo ang Converge, habang ang Blackwater ay mayroong dalawang panalo at walong talo. 

Para naman kay Justine Baltazar, nagpapasalamat siya sa koponan na nabigyan siya ng pagkakataong makalaro ng mas mahabang minuto, at bilang ganti ay ibinigay naman nito ang kanyang buong makakaya sa laban. 

“Nagamit ako lalo kasi si Justin Arana [na-injure]. Sana OK lang siya. Pero binigyan pa rin ako ng chance para makalaro. Ibinigay ko lang ang best ko.” ani Baltazar. 

Sa ngayon, itutuon ng Converge ang atensyon nito sa huling laban kontra sa San Miguel Beermen upang malaman ang kapalaran kung sa twice-to-beat ba o sa best-of-three series sasalang sa quarterfinals.

The Scores:

CONVERGE 127 – Heading 22, Baltazar 20, Diallo 20, Stockton 19, Delos Santos 10, Winston 10, Santos 8, Nieto 8, Arana 7, Racal 3, Caralipio 0, Andrade 0.

BLACKWATER 109 – King 34, Tungcab 20, Chua 16, David 14, Kwekuteye 10, Casio 6, Corteza 4, Ponferrada 3, Guinto 2, Montalbo 0, Ayonayon 0, Jopia 0.

Quarter Scores: 33-26, 70-56, 97-88, 127-109.