Unang MVP trophy ni Fajardo ipapasubasta para sa mga biktima ng Tino
7
Mga batang mandirigma sa bansa, humakot ng medalya sa Jiu-jitsu International Federation World Championship
Rico Lucero
Humakot ng mga gintong medalya ang batang Pinoy jiu-jitsu team matapos ang kanilang pagsali sa prestihiyosong Jiu-jitsu International Federation World Championship nitong Sabado sa Nagoya, Japan.
Nanguna sa kampeonato si Brielle Bartolome na nanigurado ng dalawang gintong medalya sa gi at no gi divisions.
Tinalo ni Bartolome si Peng Nian ng China via armbar, kung saan nanguna ito sa kindergarten featherweight sa no gi category. Agad din itong sinundan ng isa pang gintong medalya matapos namang patumbahin ni Bartolome si Nishimoto Wakana ng Japan para tuluyan nang mamayagpag sa kindergarten gi-rooster weight division.
Bukod pa riyan, nakakuha rin ng gintong medalya si Marcus Dela Cruz sa youth light featherweight no-gi kung saan tinalo naman nito si Ma Haisen ng China sa finals.
Nasungkit din ni Cesca Lepiten ang gintong medalya sa youth gi featherweight matapos namang payukuin si Kimura Alana Liu ng Japan via armbar.
Hindi nagpahuli si Thiago Bartolome na nanalo kay Laptev Maksim sa gold-medal match para pagharian ang pre-teen no gi middleweight.
Nakakuha din ng gintong medalya sina Claudia Lepiten sa toddler gi light featherweight, Tessa Joson sa junior teen featherweight, Ali Joson sa kindergarten no gi rooster-weight, Tomas Joson sa youth rooster-weight, Ethan Ramos sa pre-teen lightweights at Uno Ordona sa pre-teen medium heavyweights sa torneong nilahukan ng US, Japan, China, South Korea, Brazil, Hong Kong at Pilipinas.
Ayon kay Universal Reality Combat Championship founder and president Alvin Aguilar, masaya ito sa naging resulta at ipinakitang pagsisikap ng kanilang team para makamit ang karangalang ito.
“I am very happy that our Philippine Junior Grappling Team, composed of different DEFTAC chapters, are showing everyone how hard they work and how good they really are,” ani Aguilar.
