TNT naitala ang ikatlong panalo matapos talunin ang Meralco

Naitala ng TNT Tropang Giga ang kanilang ikatlong panalo matapos nilang lagpasan ang late-game surge ng Meralco Bolts, 101-99, sa pagpapatuloy ng PBA Season 49 Commissioner’s Cup sa Philsports Arena noong Martes, Enero 7.

Naipanalo ng Tropang Giga ang laro sa pamamagitan ng game-winning free throws ni import Rondae Hollis-Jefferson matapos siyang mafoul ni Cliff Hodge, mayroon na lamang 10 segundong natitira. 

Si Calvin Oftana naman ang pinangalanang Player of the Game matapos niyang makapagtala ng 24 points, four rebounds, at two assists.

Nakapagsagawa ang TNT ng 23-point lead matapos ang kanilang 19-day break sa liga ngunit nakagawang ipatas ng Meralco ang iskor sa 99-all. Kaya pa sanang maipanalo ng Bolts ang laro kung naipasok lamang ni Hodge ang kanyang huling tira, mayroong tatlong segundong natitira pa sa laro.

Nakapagtapos naman ang TNT super import na si RHJ ng 24 na puntos, kasama ang 13 rebounds, at five assists. 

Si Meralco import Akil Mitchell naman ang nanguna para sa Bolts kung saan ay nakapagrehistro rin siya ng 24 points kasama ng 18 rebounds, at seven assists, habang si Chris Newsome naman ay nagdagdag ng 19 markers at walong assists. 

Ang panalo ng TNT ang naglagay sa kanila sa ikapitong pwesto sa team standings at nag-improve sa record na 3-2. 

Haharapin ng TNT ang Converge sa Sabado, Enero 11, habang ang Meralco naman ay nakatakdang kalabanin ang NLEX sa Biyernes, Enero 10.