Alas Pilipinas, sasabak sa Leg 2 ng 2025 SEA V.League sa Vietnam
6
Gilas Pilipinas at Chinese Taipei magtutuos mamayang gabi
Rico Lucero
Matapos ang kanilang quick stop kahapon sa Maynila, nasa Taiwan na ngayon ang Gilas Pilipinas Team sa pangunguna ni Coach Tim Cone.
Susugurin ng Gilas Pilipinas ang third at final window ng 2025 FIBA Asia Cup Qualifiers mamayang alas-7 ng gabi, Huwebes, February 20 sa Taipei Heping Gym.
Target ng Gilas team na maulit ang kanilang 106-53 na panalo kontra Taiwanese noong Pebrero 25, 2024.
Una rito, galing ang Gilas Pilipinas sa Doha, Qatar kung saan pinaunlakan nito ang 2nd Doha Invitational Cup at nakuha lamang ang ikatlong pwesto, matapos matalo sa Lebanon at Egypt.
Determinado rin ang Gilas Pilipinas na makuha ang dalawang panalo sa qualifiers at sakaling ma-sweep nila ito magiging maganda na ang kanilang ranking sa FIBA Asia Cup.
Sinabi naman ni Gilas Pilipinas head coach, Tim Cone na may mga pagbabago aniyang ginawa ang kanilang kalaban kung saan pinalitan ng Chinese Taipei ang kanilang naturalized player.
“They made some big changes. They changed their naturalized player with a seven-footer, who had six or seven blocks against New Zealand, They played New Zealand right to the very end but New Zealand broke away in the end,” ani Cone.
Umaasa din si coach Tim Cone na ang kanilang karanasan sa Doha ay lalo pa sila patatagin at pahuhusayin.
“Anytime we're playing on the world stage against other national teams, it’s very important that we win. We're hoping the Doha experience makes us better, we wanted it to be tough. We wanted it, I think that teams learn from adversity, teams learn when it’s really hard. That’s why you have hard practices, why you play tough opponents because that makes you better,” dagdag pa ni Cone.
Pagkatapos ng laban na ito ng Gilas Pilipinas ay sunod na makakaharap ng mga ito ang New Zealand na una na nilang tinalo noong Nobyembre nang nakaraang taon.
Wala namang bearing ang dalawang laro nito sa qualifiers kontra sa Chinese-Taipei at New Zealand dahil pasok na ang Gilas Pilipinas sa FIBA Asia Cup tournament na isasagawa sa Agosto sa Jeddah, Saudi Arabia.
Samantala, sa inilabas na listahan ng Samahang Basketbol ng Pilipinas (SBP) na 12- manlalaro ng Gilas Pilipinas, nanguna si AJ Edu sa 12-man roster kung saan siya ang magiging kapalit ni Kai Sotto na hindi makakalaro kasama ang GIlas dahil sa tinamo nitong ACL injury.
Kabilang din sa roster list sina Justin Brownlee, June Mar Fajardo, Scottie Thompson, Japeth Aguilar, Jamie Malonzo, Chris Newsome, Calvin Oftana, CJ Perez, Kevin Quiambao, Dwight Ramos, at Carl Tamayo.
Magiging reserves naman sina Troy Rosario at Mason Amos matapos na hindi makasama sa final roster.
