POC, iaapela ang mga tinanggal na sports sa 33rd Southeast Asian Games

Matinding apela at pag-lobby ang gagawin ng Philippine Olympic Committee para maibalik ang nasa 12 sports na tinanggal ng Southeast Asian Games organizers sa magiging programa nito sa susunod na taon. 

Ayon kay POC president Abraham Tolentino, ilalaban nila na isama pa rin ng mga organizers ang 12 palarong tinanggal nila, kabilang sa mga sports na kanilang iaapela ay ang dancesports, jiu-jitsu, karate, weightlifting, kung saan ang mga Pinoy ay may tsansa na makakuha ng gintong medalya. 

Hindi rin sila nawawalan ng pag-asa sa bagay na ito at hihintayin din umano nila ang magiging resulta ng pagpupulong ng SEAG Federation sa susunod na buwan. 

“We are fighting for all the 12 sports, including dancesports and chess. The meeting will be on 25 October. So, between now and 25 October will be the push to convince the organizers which sports will be included because by then, the results will already be presented.” ani Tolentino 

Magugunitang nitong Hunyo, inihayag ng mga organizer ng SEA Games na babawasan nila ang bilang ng mga palakasan sa susunod na taon. 

Sakaling tuluyang hiindi na mapasama ang dancesports,weightlifting, wushu, jiu-jitsu at karate ay apektado ang mga star athletes ng bansa na sina Kaila Napolis, Annie Ramirez at Marc Lim para sa larong jiu-jitsu; Agatha Wong sa wushu; Jamie Lim at Sakura Alforte ng karate; at Erleen Ando at Vanessa Sarno ng weightlifting, na pawang naghatid ng mga gintong medalya sa nakaraang edisyon ng Palaro sa Cambodia noong nakaraang taon.