Unang MVP trophy ni Fajardo ipapasubasta para sa mga biktima ng Tino
7
Pinoy basketball referee, kabilang sa elite level ng FIBA
Rico Lucero
Kung mayroong basketball referee sa kasalukuyan na kabilang sa hanay ng mga tinaguriang “elite” level ng FIBA, isa na rito ang nag-iisang Pinoy basketball referee na si Glenn Cornelio.
Pangarap ni Cornelio na makakapasok sa World Cup, at sa ngayon, hawak ni Cornelio ang FIBA black license kung saan saklaw nito ang mga kompetisyon para sa men and women.
Naging bahagi din si Cornelio sa katatapos na East Asia Super League championship finals sa Macau kamakailan.
Bukod kay Cornelio, may lima pang Filipino international referees na accredited ng FIBA—sina Totie Celeste, Aaron Canete, Harry Santos, Ralph Moreto, at Christian Penaojas. Gayunpaman, si Cornelio lamang ang nasa elite level para sa 2023-25 cycle.
Ayon kay Cornelio, target niyang maging referee sa World Cup main competition matapos siyang mapabilang bilang “reserve” sa nakaraang World Cup.
“Sa ngayon, ang target ko ay makapag-referee sa World Cup main competition, reserve referee ako sa last World Cup,” ani Cornelio.
Para kay Cornelio, hindi biro at hindi basta-basta ang tungkulin ng isang basketball referee. Sinabi rin niya na dapat ay laging handa at may sapat na kaalaman ang isang referee, lalo na pagdating sa tuntunin ng laro at sa physical conditioning.
Mahalaga din aniya ang constant learning patungkol sa basketball dahil ang sports na ito ay laging evolving at improving kaya kailangan umano dito ay laging pinag-aaralan para laging updated.
“Basic na dapat nasa isip ng referee ay readiness at preparedness when it comes to knowledge of rules at physical conditioning. Ang motto namin ay ‘learning never stops’ dahil ang basketball laging evolving at improving kaya kailangan kasabay ang pag-aaral para updated. Basketball knowledge and refereeing knowledge both should work hand in hand,” dagdag ni Cornelio.
Nagsimula si Cornelio bilang referee noong siya ay nasa ikatlong taon sa kolehiyo noong 2002. Kalaunan, umangat siya sa UAAP, NCAA, FilOil, Liga Pilipinas, PBA, at FIBA.
Dalawang beses na rin siyang nagtrabaho sa SEA Games, FIBA Asia at World Cup Qualifiers, FIBA Asia Cup, BCL, WASL, ABL, EASL Final Four (dalawang beses), EASL Terrific 12, PBA 3x3 at 5x5, at FIBA U19 World Cup. Ang kanyang kuwento ay magsisilbing inspirasyon sa iba pang Filipino referees na nangangarap ding maabot ang rurok ng kanilang propesyon.
