PBA: RoS coach Yeng Guiao, masaya sa nakitang performance ng kanyang mga dating players.

Masaya si Rain or Shine coach Yeng Guiao sa ipinakitang performance ng kanyang mga dating player matapos ang Game 3 kontra TNT Tropang Giga nitong Linggo ng gabi, Oktubre 13,  sa Dasmariñas, Cavite. 

Kahit na problema ang turing ni coach Yeng kina Rey Nambatac, Calvin Oftana at Paul Erram, ipinagpasalamat pa rin nito na nalusutan nila ang higpit ng depensa na ipinakita ng Tropang Giga kung kaya nakuha nito ang manipis na panalo, 110-109. 

“Siyempre masaya kang makita sila doing well with other teams, how they improved as a player from the time they played under me. Buti nakalusot kami kay Poy.”

“We’re able to hang in there against a great team, with a great import. Every game is a learning experience for us. Mabuti nailusot namin kasi ayaw naming ma-sweep kamukha nung last semis namin sa San Miguel," ani Guiao. 

Magugunitang dating player ni Guiao sa Elasto Painters si Nambatac, habang hinawakan naman niya sina Erram at Oftana sa NLEX.

Matatandaang nagpakitang gilas sa laro ang mga dating manlalaro ni Guiao kung saan nakapag-ambag ng mga importanteng puntos sina Nambatac at Oftana noong unang dalawang laro ng serye kung saan naipanalo ito ng TNT.

Samantala, sumambulat din si Erram ng career high-tying at playoffs career-best na 27 points, 5 rebounds, 3 assists, 3 steals at 2 blocks nitong Game 3.

Pagkatapos magtala ng 7 puntos sa first half, nagsalansan ng 9 sa third quarter ang 35-year-old big man bago ikinalat ang 11 niya sa dikdikang laban sa final canto.

Ngunit sa dulo ay nanaig ang pagsisikap ni RoS import Aaron Fuller para maitakas ng Rain or Shine ang panalo at ilapit ang best-of-seven series sa 2-1.

Sa Miyerkules, Oktubre 16, susubukan ng Elasto Painters na makaisa muli ng  panalo sa Game 4 kontra TNT sa pagpapatuloy upang itabla ang serye sa PBA Season 49 Governors' Cup semifinals.