Miyembro ng Obstacle Course Race (OCR) ng Pilipinas, pumanaw na

Pumanaw na ang beteranong miyembro ng koponan ng Obstacle Course Race (OCR) ng Pilipinas at Southeast Asian Games multi-medalist na si Mervin Guarte. 

Si Guarte ay pinagsasaksak hanggang sa mamatay ng hindi pa nakikilalang suspek habang ito ay natutulog nitong Lunes ng madaling araw ng January 6, sa Calapan City, Oriental Mindoro.

Sa imbestigasyon ng PNP Provincial Regional Office MIMAROPA, natutulog ang biktima sa sala ng bahay ng isang barangay kagawad nang pumasok ang suspek dakong alas-4:30 ng madaling araw at pinagsasaksak sa dibdib si Guarte. 

Mabilis namang tumakas ang suspek sa hindi malamang direksyon matapos ang krimen.

Sinabi ni Calapan City Youth & Sports Development officer Marvin Panahon, na si Guarte ay nakita umano sa isang inuman sa Camilmil Village bago nangyari ang pananaksak.

Si Guarte ay nagsimulang kumatawan sa Pilipinas sa athletics noong 2011 Jakarta SEA Games at nag-uwi ng isang pares ng silver medal sa men's 800m at 1500m events.

Lumipat siya sa obstacle course racing noong 2019 kung saan nakuha nito ang kanyang unang SEA Games gold, nang i-host ng Manila ang biennial meet anim na taon na ang nakararaan matapos ang paghahari sa men's 5km race.

Nasungkit din ni Guarte ang isa pang ginto sa 2023 SEA Games sa Cambodia matapos i-angkla ang OCR men's relay team.

Samantala, ikinalungkot naman ng Philippine Obstacle Sports Federation at maging ng ibang mga atleta sa bansa ang nangyaring pagpatay kay Guarte. 

“We are still in shock, very sad,” ani Philippine Obstacle Sports Federation president Alberto Agra.

“Nakakabigla, malungkot kami mga national athletes na kasamahan mo sa nangyari. Mine-message mo pa naman ako lagi sa tuwing nananalo ako. Justice para sa iyo,” ani Nestyh Petecio.

Nagpahayag na rin ng pakikidalamhati sa pamilya ni Guarte si Philippine Olympic Committee president Abraham Tolentino. 

“Mourning for our one of the medalist athletes from Patafa to Obstacle for his untimely demise,” ani Tolentino.