Gin Kings may bago ng sandata sa Commissioner's Cup

May bago ng sandatang ihaharap ang Barangay Ginebra San Miguel sa pagbubukas ng PBA Commissioner's Cup sa Miyerkules, November 27. Ito ay matapos na opisyal nang naging miyembro ng Gin Kings si Troy Rosario. 

Ito ang kinumpirma mismo ni Rosario matapos ang ilang panahong pagiging free agent at nagpasya na itong pumirma ng kontrata sa Gin Kings. 

"Dreams Do Come True. Thank you Boss Alfrancis Chua," ani Rosario sa kanyang facebook post kasabay ng araw kung saan inilabas naman ng PBA ang opisyal roster list para sa Commissioners Cup na magsisimula na sa November 27 sa Philsports Arena. 

Huling naglaro si Rosario para sa Blackwater Bossing, at niligawan din siya ng Converge at ng TNT subalit mas matimbang sa kanya ang Ginebra.

Si Rosario ay magsusuot na ng jersey No.1 para sa Ginebra.

Matatandaang sa katatapos na Governors' Cup, ang 6-foot-7 forward at dating Gilas Pilipinas big man ay nagposte ng 13.5 points, 6.0 rebounds, at 1.4 assists sa 10 laro nito para sa Blackwater.

Samantala, posible namang mag-debut si Rosario sa Gin Kings sa Disyembre 11, Miyerkules, 7:30 ng gabi, sa Ninoy Aquino Stadium sa Maynila kung saan makakasagupa ng Ginebra ang NLEX Road Warriors.

Pupunan ni Rosario ang mga pwesto ng mga injured Gin Kings players na sina Jamie Malonzo at Isaac Go.