EASL: Taoyuan Pauian Pilots, tiyak na ang pwesto sa Final Four

Nasungkit na ng Taoyuan Pauian Pilots ang huling pwesto ng Group A sa nagpapatuloy na East Asia Super League Final Four 2025 matapos talunin ang Hong Kong Eastern, 87-61, sa isang must-win game nitong Miyerkules, Pebrero 5.
Dominado ng Pilots ang laro mula simula kung saan umabot sa 16 ang kanilang lamang sa pagtatapos ng second quarter, 45-29.
Sa pagsisimula ng second half lalo pang pinaigting ng Pilots ang kanilang depensa kontra Hong Kong Eastern hanggang sa natapos ang 3rd quarter.
Dahil sa panalo ng Pilots, mayroon na itong 4-2 win-loss record, habang ang Hong Kong Eastern naman ay may kartadang 3-3 win-loss record.
Ang Taoyuan Pauian Pilots ay naging kwalipikado para sa 2024-25 EASL campaign pagkatapos maka-abot ito sa 2023-24 P. LEAGUE+.
Magugunitang binuksan ng Pilots ang kanilang debut season na may malakas na 3-0 simula sa pamamagitan ng isang kahanga-hangang average margin of points na 24.3.
Gayunpaman, pumasok sila sa matchup laban sa Hong Kong mula sa isang two game skid matapos ang magkasunod na pagkatalo sa nangungunang Hiroshima Dragonflies sa Group A.
Sa March 7, makakaharap ng Pilots ang No. 1 seed ng Group B na Ryukyu Golden Kings sa EASL Final Four 2025 semifinals sa Studio City Event Center sa Macau.
Sa March 9 naman ang isasagawa ang pagbibigay ng award prize money na $1,000,000 sa magiging EASL Champion, $500,000 naman sa runner up, at $250,000 para sa makakakuha ng 3rd place.
