Dragon Boat world meet gaganapin sa Palawan

Naghahanda nang gumawa ng kanilang marka sa pandaigdigang entablado ang mga lalahok na junior paddlers sa darating na Oktubre 28 hanggang Nobyembre 4 kung saan Pilipinas ang maghohost ng 2024 ICF Dragon Boat World Championships na gaganapin sa Puerto Princesa sa Palawan.

21 junior male paddlers at walong female paddlers ang sumasailalim sa mahigpit na pagsasanay sa isang kampo na inorganisa ng Philippine Canoe Kayak Federation (PCKF) sa Davao City.

Ayon kay PCKF President Leonora Escollante, lumaki ang miyembro ng junior squad dahil sa mga karagdagang paddlers na narecruit mula sa iba’t ibang parte ng Pilipinas, kabilang ang Davao City, Iligan City, Zamboanga City, Samal Island, San Miguel, Leyte, Paoay, Ilocos Norte, Cebu City, Cagayan, Manila, at Calbayog City.

“Naging masinsinan ang kanilang pagsasanay sa loob ng mahigit isang buwan, at committed kami sa pagtiyak na ang aming junior paddlers ay competitive sa world stage,” saad ni Escollante.

Sa pangunguna nina John Paul Selencio at Ronald Tan, ang final roster para sa junior team ay makokumpira isang buwan bago ang kompetisyon. Kumpirmadong hindi bababa sa 20 ang mga bansang sasali sa event na ito.

Dalawang buwan na lamang bago ang torneo at nalampasan na ng Pilipinas ang 15-country participation level na nakita sa 2022 championships na ginanap sa Racice, Czech Republic. Inaasahang ang 2024 event ay magtatakda ng bagong rekord para sa international participation.

Tinatayang 3,500 paddlers mula sa 35 hanggang 50 countries ang inaasahang sasabak sa paparating na kampeonato na gaganapin sa Puerto Prinsesa.