Boxing: Suarez tiwalang masusungkit ang WBO International super featherweight title vs. Castaneda

TIWALA si 2016 Rio Olympian Charly “The King’s Warrior” Suarez na masusungkit niya ang bakanteng World Boxing Organization (WBO) International super featherweight title laban sa bagong katapat nito na si American boxer Jorge Castaneda para sa 10-round battle sa darating na Sabado ng umaga (oras sa Pilipinas) sa Desert Diamond Arena sa Glendale, Arizona.

Bagaman dismayado pa rtin sinabi ng trainer ni Suarez na si Delfin Boholst, na  100 porsiyento na itong handa sa laban kahit biglaan ang nangyaring pagpapalit ng kalaban. Hindi naman inurungan ni Suarez ang nakaambang katunggali at ipinagkibit-balikat na lamang ang nangyaring pagbabago at agad na lamang tumutok at inaral ang stance at diskarte sa laban ni Jorge Castaneda.  

“One hundred (100) percent ready na si Charly kahit na two weeks nagpalit ng kalaban dahil lagi naman ready si Charly. Inaral namin, ginawa namin kapag sa training kami. Meron naman kasi two weeks na notice pero kaya agad mag-adjust,” ani Boholst. 

Si Charly ay  mahigit dalawang linggo nang nagsasanay sa pamosong Wild Card Gym sa Los Angeles sa California at Fabelle Boxing Gym at Top Rank Boxing Gym sa Las Vegas, Nevada.

Magugunitang biglaan ang kanilang ginawang adjustments para pag-aralan ang estilo at laro ng mas matangkad at batang American boxer na kagagaling lang sa sariwang second-round technical knockout win nitong Agosto 31 laban kay Angel Hernandez Pillado sa Fight Fest 15th Anniversary sa Sames Auto Arena, sa Laredo, Texas.

Si Suarez ay may boxing record na 17-0 marka kasama ang siyam na knockouts na galing rin sa eight-round unanimous decision na panalo laban kay Luis Coria nitong Abril 13 sa American Bank Center sa Corpus Cristi sa Amerika.

“Iyung talino sa taas ng ring at speed ang nakikita naming magagamit nang husto ni Charly against Castaneda, tapos isama mo pa iyung power at experience ni Charly bilang amateur ang mas maganda dito,” dagdag ni Boholst 

Sinusubaybayan nang husto ni Suarez ang kanyang mga pinupuntiryang makakalaban, kung saan habol nito ang mas mataas na rankings para  makuha ang mandatory challenger lalo na  kina WBO titlist Mexican Emmanuel Navarrete at interim champ Oscar Valdez, habang nakalinya ito bilang No. 3 rank sa likod nina No.1 ranked Albert Bell at Cortes.