Unang MVP trophy ni Fajardo ipapasubasta para sa mga biktima ng Tino
8
Boxing: Charly Suarez, pinatumba si Castañeda sa ikatlong round
Rico Lucero
Katulad ng inaasahan, hindi nabigo si 2016 Rio Olympian Charly “The King’s Warrior” Suarez na makamit ang panalo kontra American boxer na si Jorge Castañeda para maangkin din ang (WBO) international junior lightweight title sa Glendale, Arizona, noong Sabado.
Pinatumba ni Suarez si Castañeda sa ikatlong round ng kanilang laban matapos makatikim ng solidong left hook mula sa Pinoy boxing icon. Subalit nang makabangon muli si Castañeda ay muling sinundan ng kombinasyon ng suntok ni Suarez ang kalabang Amerikano at muli itong natumba at dito na ipinatigil ng referee ang laban.
Matatandaang orihinal sanang makakasagupa ni Suarez ang kapwa walang talo na si Andres Cortes sa isang WBO eliminator fight, subalit nagpasya ang kampo ni Cortes na umatras sa laban matapos magtamo ng injury ilang linggo bago ang kanilang bakbakan.
Si Suarez ay naging pamabato rin ng bansa noong 2016 Rio Olympics. Nanalo rin siya ng silver medal sa Asian Games noong 2014 at nakakuha ng gintong medalya sa Southeast Asian Games noong 2009, 2011 at 2019.
Sa ngayon, mayroon nang boxing record si Suarez na 18-0 kung saan 10 sa mga naging laban nito ay knockouts, habang si Castañeda naman ay bumagsak sa 17-4 win-loss record na may 13 knockouts.
Sunod na tatargetin ni Suarez si WBO junior featherweight champion Emmanuel Navarrete.
