‘Bata’, Boyes pinangalanang captains ng Reyes Cup

Itinakdang maging kapitan si Efren ‘Bata’ Reyes ng Team Asia habang si Karl Boyes naman sa Team Europe para sa pinakahihintay na Reyes Cup na gaganapin mula Oktubre 15 hanggang 18 sa Ninoy Aquino Stadium.

Ang Reyes Cup ay nakatakdang gayahin ang format ng prestihiyosong Mosconi Cup kung saan dalawang elite teams ang maglalaban-laban sa loob ng apat na araw ng kompetisyon. May kabuuang 21 na laban, kabilang ang mga single at doubles. Ang unang team na makakapuntos ng 11 ang makakapagkamit ng pagkapanalo. 

Ang Team Asia ay pangungunahan ni Efren Reyes na tinaguriang “greatest player in the history of the sport”. 

“Ang tagal kong hinintay ito. Mula nang itatag ang Mosconi Cup, gusto ko ng isang bagay para sa Asya," saad ni Reyes. “Lamang ang Europe dahil sa kanilang karanasan sa arena na iyon, ngunit ang Asya ay may marami ring kasanayan at talento upang makapagkamit ng panalo. Inaasahan ko rin ang isang potensyal na eksibisyon laban sa kapwa kapitan kong si Karl Boyes."

Ang magle-lead naman sa Team Europe ang ang six-time Mosconi Cup champion na si Karl Boyes.

“Ang Nineball career ko ay nagsimula noong 2007 sa Matchroom dito sa Pilipinas, kaya alam ko kung gaano kalaki ang isport at ang event na ito para sa bansa. Hindi ako makapaghintay na pamunuan ang Team Europe bilang kapitan sa susunod na buwan,” sabi ni Boyes.

Sina Aloysius Yapp, Johann Chua, at Ko Pin Yi ang unang naging kwalipikado at mangunguna sa Team Asia, habang sina Eklent Kaçi, Mickey Krause, at Joshua Filler naman ang sa Team Europe.

Nakatakdang pumili sina Reyes at Boyes ng dalawang wild card para kumpletuhin ang kanilang team sa darating na Oktubre. Inaasahang ang Reyes Cup ay magiging flagship event sa pandaigdigang pool calendar.