Bago at modernong Velodrome sa Tagaytay City, pinasinayaan na

Pormal nang binuksan sa Tagaytay City, Cavite ang pinakabagong indoor velodrome sa bansa kung saan ini-akma ito sa International Cycling Union (UCI)-grade BMX track standards, at inaasahang magiging panibagong sentro ng pambansang sports development sa bansa.

Pinangunahan ni ni Philippine Olympic Committee president Abraham “Bambol” Tolentino ang ribbon-cutting ceremony kasama sina Cavite Governor Athena Tolentino, Asian Cycling Confederation president Dato’ Amarjit Singh Gill, Philippine Paralympic Committee president Mike Barredo, kasama ang ilan pang mga opisyal ng Tagaytay City Local Government Unit. 

Dumalo rin sa makasaysayang okasyon sina double Paris Olympic gold medalist Carlos Yulo at Olympic boxing medalist Nesthy Petecio, kasama ang ilang opisyal ng POC at mga pinuno ng iba’t ibang national sports associations.

Ang pagbubukas ng Velodrome ay inaasahang magbibigay-daan sa mas mataas na antas ng kompetisyon at pagsasanay ng mga Pilipinong siklista, habang pinapanday din ang mas malalim na pagkilala sa mga bayani ng bansa sa pamamagitan ng sports.

Samantala, bilang pagpupugay naman sa ating pambansang bayani, itinayo sa harap ng pasilidad ng Velodome ang isang 12-foot stainless steel na estatwa ni Dr. Jose P. Rizal. 

Ayon kay Philippine Olympic Committee (POC) president Abraham “Bambol” Tolentino, layunin ng monumento na ito na  kilalanin si Dr. Jose Rizal hindi lamang bilang bayani, kundi bilang isang tunay na atleta.

“It’s a tribute to our National Hero, the sportsman, the athlete. We Filipinos know very well that Dr. Jose Rizal excelled in everything he engaged in and in sports, he was a fencer par excellence, a sharp shooter and if there were titles during his time, a grandmaster of ahedres—chess,” ani Tolentino.

Bukod sa pagpapasinaya ng modernong Velodrome, isinabay na rin sa inagurasyon ang bago at modernong City Hall ng Tagaytay na matatagpuan din sa kanilang lungsod.